(( نــعــاء ))
في فقد الأب
٠٠٠٠٠٠٠٠٠٠٠٠٠٠
محلا الأبو مابين لولاد .
ومحلاه في أيام لعياد .
يجمع العيله على المعتاد .
يقعد معاهم ياكل الزاد .
أيام حلوَه بيها لمراد .
ياليتها دامت إلي عاد .
لكن حسافه طاح لعماد .
راح الأبو وانفجع لفاد .
.....................
والله الأبو فرقاه يصعب .
مثل الجمربالچبد تلهب .
من أذكره دمع الوجن صب .
أويلاه نعشه ابعيد غرّب .
ماظن بعد يرجع لي الأب .
...................
والله الأبو سور اودلال .
في البيت يضوي چنّه اهلال .
محلاه مابين لعيال .
ومحلا سواليفه ولمثال .
من شوفته لهموم تنزال .
حسافه كبيرالعايله شال .
راح الأبو واتبدل الحال .
...................
أبويه ودلالي شال عني .
للمقبره سافر وهدني .
راح ودعاني النوح فنّي .
خالي مكانه يزيد حزني .
وزلزل شظايا الروح مني .
ذوّب إحشاي وهدّ ركني .
ياليتني وياه أخذني .
..................
ويلاه عود البيت ويلاه .
راح القبرعنا وخسرناه .
خلا البيت من شوفة محيّاه .
ياناس أبويه صعب فرقاه .
والعيشه ماتحلا بليّاه .
يمتى يرد واسمع حچاياه .
ويرجع يلم الشمل ويّاه .
هيهات أبويه بعد ألقاه .
.....................
مات الأبو واتيتمينا .
راح الذي ايدلّل إلينا .
حسره على فقده بقينا .
غاب الفرح من بعد عينه .
اليوم النزل مظلم ابدونه .
والعايله كلها حزينه .
أويلاه أبونا فاقدينه .
للمقبره شايل ولينا .
راح الذي يشفق علينا .
.....................
٠٠٠٠٠٠٠٠٠٠٠٠٠٠
✍🏻لخادمة أهل البيت
أم جمال خواهر
16 / ذي القعدة
1438 / هـ
ليست هناك تعليقات:
إرسال تعليق