( في شأن الزهراء )
ووصيتها لأبنائِها
عليهم السلام
::::::::::::::::::::::
يبني تدري ...
خلص عمري يادلالي ،
قوموا لـمكم ...
خل تشمكم يالغوالي ،
قربوا منّي يالبزر
خل أضمكم بالصدر
قبل لا اروح القبر
يالغوالي ... يالغوالي
---------------
ياحسن يبني تدنّى خل أشمّك
يالولد ،
واحضنك مابين صدري والثمك
يالمضطهد ،
خلني اتزوّد إمنّك قبل لا روح
اللحد ،
اشبيدي إعلى البيك يجري منَّك
اتذوب الچبد ،
چنّي اشوفك بالطشت
بالدمآ چبدك تكت
اويمَّك اتنوح الإخت
يالغوالي ... يالغوالي
---------------
ياحسن قرّب إمنّي خل أضمّك
بالصدر ،
يبني واشتمّك ابحلقك قبل ماروح
القبر ،
ليتني يالولد يمّك يوم چبدك
تنفطر ،
اقبال اخوك احسين واختك ياحبيبي تحتظر ،
ذاب من خوك القلب
من يشوفك تضطرب
وزينب المدمع تصب
يالغوالي ... يالغوالي
----------------
احسين يايمّه تدنّى يمّي يامهجة
حشاي ،
فوق صدري خل أضمّك وشم
نحرك ياضناي ،
قبل ماتغمض إعيوني وينقطع
منّي هواي ،
اعليك يايمّه اشبيدي اتموت
ماتشرب الماي ،
تنذبح يمّه ابظما
والنهر يمّك طمى
ليت لعيوني العمى
يالغوالي ... يالغوالي
---------------
يمّه يازينب تعالي خلنا نتزوّد
وِداع ،
وخلني باشمها امتونچ قبل ما
أرحل الساع ،
اشبيدي يايمّه اعلى حالچ وانتِ
مسلوبة قناع ،
والسياط اتلوح فوقچ وانتِ مچتوفه
الذراع ،
فوق ناقه امهزّله
باليتاما امبهدله
وهلچ صرعى اعلى الفلا
يالغوالي ... يالغوالي
---------------
وصاحت ابأسما يأسما إخذي
لحسين اوحسن ،
خلهم ايروحوا لبوهم لا يسمعوني
امن اوِّن ،
واخذي زينب نيِّميها واحضري
ليَّه الچفن ،
بغتسل والبس اچفاني لاتدخلي
من أسِنّ ،
من على وجهي الرِّدى
اومن تريني امّدده
لاتعلِّين النِّدا
يالغوالي ... يالغوالي
--------------
خلّي ياأسما الوديعه زينب
ابحضنچ تنام ،
زين غطِّيهااولزمي حسن وحسين
الكرام ،
راحله الليله يأسما اوداعة الله
والسلام ،
جهّزي نعشي يفضّه خل يشيعوني
ابظلام ،
الصوت لا يطلع أبد
ما أوِد يسمع أحد
اوداعة الباري الصمد
يالغوالي ... يالغوالي
---------------
✍🏻لخادمة أهل البيت
أم جمال خواهر
19 / ربيع الثاني
1439 / هـ
ليست هناك تعليقات:
إرسال تعليق